المريخ .. فترة صلاحية (التونة) أطول من إقامتو في الأبطال..
المريخ في الأبطال زي (البُوهية اللينة).
ما بثبت نهائي .
أو زي (صباع الأمير) الضارباهو شمس .
(صباع الأمير) منجض شغلتو أكتر من المريخ .
حصل قابلك (صباع أمير) بيقوم في نفس الدقيقة؟
زمان كان عندي (نظارة شمسية) يدها إتسكرت أديتها (صباع أمير) لحدي تاريخ اللحظة (منسترة معاي).
المهم ..
فترة صلاحية (التونة) أطول من فترة (إقامة المريخ في الأبطال).
والله صحي.
بل الصحيح .. (الزبادي) صلاحيتو أطول من صلاحية المريخ في الأبطال .
لو عندك (تلاجة) كويسة ممكن تحفظ ليك الزبادي أسبوعين بدون مشاكل .
لكن المريخ في الأبطال ما بزيد من أسبوع .
حليل زمن التلاجات .
سيحفظ التاريخ أن (حميدتي الغبي) عمل حرب ضد الجيش لكن أول حاجة فكر فيها هي (تلاجات المواطنين).
عشان تعرفوا زول بليد كيف .
شال التلاجات ، علماً بأن بعض التلاجات كان فيها (باقي سلطة) ودواء كحة .
المهم ..
السبت دور أمس إتغلبوا في الكنغو والسبت أمس إتعادلوا في ليبيا .
يعني طارو في أسبوع فقط .
إقامة المريخ في الأبطال سبعة يوم واليوم الثامن طارو .
(الدقن) لو حلقتها ما بتقوم في أسبوع .
المريخ بقوم أسرع من (الدقن) ذاتا .
تشوف التسجيلات والمحترفين (العشرة المبشرين بالمرمطة) تحلف تقول دا ما فريق بيطير من التمهيدي .
تشوف الصور والتشيرتات تحلف تقول دا الهلال.
المريخ في الأيام الفاتت دي جرب كل الألوان.
حتي الأبيض عملوا فيهو نجمة ولبسوهو .
لما شافوها شينة قالوا دا ما أبيض دا (كريمي).
طبعاً هم عايزين (يغشوا) التمهيدي .
عايزين يتنكروا عشان التمهيدي ما يعرفهم .
يعني غيرو لون الشعار عشان التمهيدي ما يقول دا المريخ .
عملوا شعار في شكل أبيض كدا عشان التمهيدي ما يعرفهم.
مساكين .
التمهيدي بعرف ناسوا .
عاملين فيها أذكياء (لبسوا أبيض) عشان التمهيدي يقول دا ما المريخ.
ههههههه .
والله التمهيدي دا لو لبستوا شعار برشلونة ذاتو يعرفكم .
غيرو الشعار من أجل كسر النحس .
جربوا الأبيض.
والأسود .
والرمادي.
دا غير شعارهم البشبه (كبسولات النزلة) داك .
فوق أصفر وتحت أحمر .
كبسولة إلتهاب بس .
هسه عليك الله في زول نصيح بلبس أحمر والبلد فيها حرب ؟
المهم .
طبعا المريخ قبل المباريات المهمة بعمل ليهو حركات كدا .
بيحاولوا يحسسوك إنهم فريق كبير.
والله صحي.
في نهائي النخبة لما أدينا المريخ أربعة ، لعيبة المريخ قبل المباراة دخلوا الملعب وكل لاعب شايل ليهو (زمزمية).
نظام لعيبة كبار وعايزين يتحسسوا أرضية الملعب .
وبدت المباراة.
وعينك ما تشوف إلا روفا .
روفا في نهائي النخبة شال مجلس المريخ .
وكان سبب في لجنة تسيير جديدة يقودها جمال الوالي حالياً .
يعني أنت فاكر تسجيلات المريخ الأخيرة دي عملتها لجنة التسيير ؟
دا جمال الوالي يا مولانا .
قروش جمال الوالي نحن بنعرفها .
قروشو حدها التمهيدي .
هسه قبل مباراة الأمس عملوا حركات .
قالوا ما دايرين تلفزة .
ومنعوا التصريحات .
ومنعوا زيارة الجمهور للمعسكر .
هو الجمهور المباراة ما جا البجيبو المعسكر شنو ؟
المهم .. موسم المريخ إنتهى .
المفروض المحترفين العواطلية ديل كل زول يشوفو بلدو وين .
والله أنا أكتر حاجة أثرتني إنو في محترف من العواطلية ديل عمل (صبغة) في شعرو مخصوص للأبطال.
عامل فيها الولد خلاص نجم كبير .
مسكين (الصبغة) ما ظهر بيها زي الناس الجماعة طاروا .
أنت قبل تعمل (صبغة) كان تعمل نظرة عشان تعرف تاريخ المريخ في الأبطال.
المريخ في الأبطال ما بصبر علي (صبغتك) دي والله .
أحلق صلعة وخش الملعب.
أصلاً هي مباراة واحدة .
والمباراة الواحدة ما عايزة ليها (صبغة) ولا عايزة ليها (قطعية ذاتو).
إنتهى موسم المريخ قبل يبدأ.
أظرف حاجة عملوا لرمضان عجب عملية جراحية عاجلة وكذلك قباني.
قالوا يعالجوهم سريع عشان يلحق بالفريق في دور المجموعات .
غايتو البركة في العملية .
العافية سمحة .
الأبطال (شعر المريخ ما عندو ليهو رقبة).
طبعاً ناس المريخ أول ما يطيروا من التمهيدي عندهم صورة بتاعت (إبريق مانديلا) بطلعوها يقول ليك (كأس مانديلا).
وهو في الحقيقة (إبريق حديد) بمناسبة (دورة رباعية بتاعت السلام الأفريقي).
أطلقوا عليها (كأس مانديلا) تقديراً لجهود مانديلا في نشر السلام بالقارة .
والكاف عشان يشجع السلام قام إعتمد البطولة بأثر رجعي تقديراً لمانديلا.
يعني هي زي الدورة الرمضانية لكن الكاف إعتمدها تقديراً للمناضل مانديلا .
عموماً .. لو في محترف عاقل في المريخ المفروض يفسخ طوالي .
ما في سبب بيخلي موسى كانتي يقعد في المريخ .
أكسبوا زمنكم .
تقعدوا تنططوا في التمارين السنة الجاية دي كلها وبرضو النسخة القادمة حدكم التمهيدي .
و……و….
وبعد ما فات الأوان الليلة جاي …. (تعمل ليك صبغة شعر بي واحد جنيه).
