نمرق حبة بتقوي المناعة
يوميات علوب …
( حبر ومداد) ….!!!
كان معانا واحد في الجامعة اسمو ( الحبر ) …..
تسمع ( الحبر ) تقول إمام الجامع …!!
( إسم وقور صاح …)
أها ( الحبر ) مرمط الاسم دا في الواطة دي ……!!!
( محبرة وانكشحت …)
هو طبعا زول لذيذ شديد …وصاحبنا شديد …ولطيف شديد
وبراهو بقول لي أنا الجامعة دي مافي شي جابني ليها غير( البنوت ) ديل ….!!
ولا داسيها …!!
قال هو من عشاق الجمال …!!!
وبي أدب ….!!
مرات بقول شعر ….!! مرات بجدع دوبيت ….!!!
وأحيانا قف تأمل ….!! ☺️
وصراحة نظرتو مابتجلي …وعينو نجييييضة …!!
كنا مرات بنستدعيهو عديل كدا إذا حدث خلاف قانوني في تقيييم إحداهن …!! فلدي ( الحبر ) القول الفصل ..!! والخبر اليقين..!!
نقول لي فلانة دي هسا سمحة ولا الحاصل شنو…!!
يعاين ليها كداااا وبدينا النتيجة …..!!
( في ملاريا ولا مافي…!! )
بعدين حافظ البنات السمحات ديل في الجامعة أكتر من المقررات …!! وفِي كل الكليات..!!
( الحبر يعتمد اللامركزية نظاماً للحكم )
هو أصلا بقرا ( آداب ) قال لي أنا كان رغبتي هندسة بس خذلتني الرياضيات ….!!.،….( إتخيل ليك منظر )
قال لي كنتا شاطر فيها شديد لحدي ماظهرو ناس ( س ) و( ص ) ديل …إتعقدتا منها شوية …..!!
ولمن دخلنا في ( المربع) ( وشبه المنحرف) أنا ذاتي انحرفتا
أها لمن ظهر ( جيب التمام ) …!!
قال لي بديت اقنع
واليوم الأدونا فيهو نظرية الاحتمالات عرفتا إنو أنا إحتمال كبير أجلي فكرة ( هندسة ) دي أصلا
قال لي لحدي ما وصلنا ( جتا ) و ( جتا٢)
الواطا ضلمت ويووووم الظهرت ( ظتا )
قال لي طوالي ( شتتا )
..
قال لي إنتا ( جتا وظتا ونق ٢ ) ديل شنو هن ……!! ؟؟
إنس ولا جن ….!!!
نقعد نستنا ( شبه المنحرف ) لحدي ما ننحرف رسمي … ونشارك في الجريمة دي …..يفتح الله ….!!!
طوالي اتخارجتا …
المهم الله جابني ( آداب ) ( الحنينة ) دي ….!! هسا لو ما ( آداب ) دي زي ( سلافة ) دي كان نشوفا وين ….!!!
وصدق الحبر ) …!!!
( كلنا سلافة ) …..!! 🥰
نحنا ذاتنا كنا بنجي ( مكركرين) من كليتنا نتفرج فيها ونرجع سامنها ( سلافة الزرافة …)
أطول من العميد ……!!!
سماحة قاطعة ….وبعد دا كلو ظريفة …..تضحك مع أي زول زي المضيفة…!!
وأي واحد بتخيلا ضحكت معاهو حصريا ويرجع
مبسووووط ….!!! 😀
أها دي سلافة الفن ….!!
بت زي المطرة تهطل علي الجميع ….!!!
والله بدّي الجنة ……!!!
المهم ( الحبر ) بس كدا مغرم بالجمال أينما حل …
حافظ البنات السمحات الفي الجامعة ديل حفظ ….!!
يقول ليك ( هويدا ) بت صيدلة …( وسحر ) بت هندسة ….( أماني ) بيطرة …وسعاد بت القانون …
أها ( سعاد ) دي كمان ( كتاب ) برا …!!
جاية من حتة بعيدة كدا في السودان الكبير دا ….لكن بالله الحق وقفت ليك بنات ( المنشية ) ديل إنتباه …!!
سماحة أصلو مامعقولة …مرات بتلبس توب …!!
كرهت ليك البنات التوب ذاتو …..سامنها وكيل النيابة الأعلى ….!!
( حلا ووقار ) …🥰
غايتو السودان دا شايل شيل ….!! الله يحفظو بس …..!!
بهناك كمان ( إنتصار ) أيقونة إقتصاد …..!!
إنتصار دي كمان نااااار ..قيامتا قايمة 🔥
الحبر قال ( إنتصار ) انتصرت للحق والفضيلة
والجمال …
مفروض يعلقوها في مدخل الكلية ويدفعو ليها راتب ….!!!
مرات بصحح بيها يقول ليك فلانة دي جايبة ستة من انتصار وديك تمنيه من انتصار
غايتو إنتصار عبرت وانتصرت
أها دي ميزة البلد دي ….!! تنوع عجيب
( والحبر ) عندو ( مسادير) في البنات ديل …لدرجة إنو نص بنات الجامعة عندهن خبر بالقصة دي …وفِي مسادير اتسربت
مره قال في ( سحر ) بت هندسة دي
**********
سحر سحرتنا بي ديسا وجمالا الهادي
وسحر كتلتنا خلقه لمن هناك بي غادي
وكت الليل يجن…! والجامعة ليا تنادي
ما بسمع غير سحر …!! ساحراهو جوه فؤادي
أنا اخو السمحة …..✊كلام والله ….
قلنا ليهو إنتا سعاد ( القيامة ) دي ليي ماقلتا فيها حاجه
قال في سعاد مابقدر أقول مسدار
سعاد اللبن الحليب بالرُقاق الحار
سعاد ( كاتلاتا ) رقة وسماح ونضار
سعاد ( الزيت ) …!!!
والزيت تحرم عليه النار
……..هيييييع ….!!! أبشر ااالحبر
أها نوع الكلام دا بعجب البنات…!! فأصبحن يتقربن من ( الحبر )
كان يجدع فيهن مربوع ….
ومن حظيت ….عبرت..!!
الحبر بقي زي الزين …..!! مكتول في حوش الجامعة
تنتظره الحسناوات ليقول كلمة …!!!!
والبنضم فيها الحبر …زي الجابوها في غلاف مجلة
يذيع صيتها …!! وترتفع إسهمها ….!! ويتردد صداها في ردهات الجامعة
أها لمت ليك فيهو ( وعد ) ….!!!
( وعد ) دي شهادة لندن ….!!
إسما ( وعد صلاح )
شوف الأبو ذاتو إسمو منو …!!؟
( تخجل يالحبر ) ….!!
سايقا ( صلاح ) ….!!
أها ( وعد ) …. اللسان من الانجليزي لما معووج …وهي خدورية ولذيذة كدا …!! كل يوم لبسة جديدة …!! وكلها حركة وحيوية ( شغل لندن كمان …..)
وهي مع ناس ( الحبر ) في آداب ….!! علي الانجليزي العليها دا…!! ماخدة فرنسي وروسي ..!!
أبو الزفت ( التلاته في مجلس الأمن )
( زي ذي عادي بكون عندها حق الفيتو ) !!
( الحبر ) قال لي أول مادخلنا الجامعة كان بتحكي لينا أفلام كدا حضرتا بالإنجليزي ….وبي نفس ( الاكسنت ) بتاع الخواجات داك …!! قايلانا دفعتا ….!!
ونحن الوكت داك جايين بي ( برزنت كونتينيوس تنس ….) …!!!
والمنقطا فينا ورهيب شديد ( برزنت بيرفكت كونتينيوس تنس …) ( الاتنين مع بعض بيرفكت وكنتنيوس ) …..!!!
دا مقفل
تعبو فينا ساكت ستفونا ( قواعد ) وخلو الانجليزي …
لكن بعد داك طقطقنا زي ماقال الكتاب
المهم قال لي هي تحكي ونحنا مافاهمين ولا حاجه أول ما تحكي حاجه مضحكة في الفيلم بنضحك معاها ….!!! نشوفا صرت ..بنصُر 😠….!!
بس شغالين معاها كد…!! باص وخانة
يعني لو يوم حكت عن حادث في الفيلم ونحنا ضحكنا كان الضحك شرطنا ….!!
الغريبة قال لي كانت بتقول لينا أسماء الأبطال ديل عشان تحفزنا نحضر الفلم قايلانا بنعرفم …!!!
( دا بسمو الإفراط في التفاؤل وحسن الظن ) …!!
قالت ( دياز ) كانت روعة روعة و amazing
في الفلم الأخير …!!
( هو الاول ذاتو وينو …!؟؟ ) ..😳
واحد صاحبنا اسمو ( التاج ) متفلسف كدا قال ليها ماغريبه عليهو دايما أدوارو متميزة …..!!!
طلعت مرا 👩….🙈🙈
( التاج أسبوع غايب من الجامعة ) ….!!!
ماشاءالله تبارك الله ربنا يغتي عليها ( كاميرون بت دياز ) بالرفاء والبنين إن شاءالله …..!!
عليك الله شوف الناس دي في شنو …ونحنا في شنو …..!!
أها( وعد ) قالت لي ( الحبر ) قالو بتقول ( شعارات ) …!!!
اتخيلو البت دي قاصدا شنو بي ( شعارات ) دي ….!!؟؟
قاصدا الشعر والقصايد البقولا ( الحبر ) دي …!!
دي معناها لو دايرا تقول ( مسادير ) …
نجهز أنبوبة الأكسجين ….!!!
مافي حل …..!! حتفقد سوايل …….
( الحبر ) طبعا لو مالجامعة ومجانية التعليم دي ….هو ووعد دي إلا يتلاقو في الأستوب 🚦….!! )
يازول حسا ليك بي عظمة قال ليها …..!! أيوا بقول…!! ويالسمحة خاتي القول …!!
عليك الله اتصلح معانا يالحبر شنو خاتي القول ….!!
وشن بقول …..!! وأنا اخوك يالسمحة ….!!
والكلام البفلق دا …..
هي ( وعد ) دي …الشعر قالت شعارات …..!!
شابكنا خاتي ….!!! وبعاتي …!! داير تكتل البت …صاح ..!!!
طبعا نوع الكلام دا بالنسبة ليها عبارة عن اللغة الأمهرية ….
تكون هسا بتقرا لي الشاعر الانجليزي ( بيرسي شيلي ) شعر الخواجات المسيخ داك ……..
أنا وأنت ( زنبقتان ) 🥀🥀تتفجران أحاسيس ….
نتكي علي ضفاف التيمز …!!! 🌞
ونسرق لحظات من صمت الكون …..
وتلتقي أرواحنا علي صفحة الميلاد
( الله يرحمك ياعتيق ) …!!!
عتيق قال ….
ليك نفرة الغزلان مع جبرة الفرسان في هيبة المنصور
يعيش السودان 🙌
هسا دي بتكون عاملة كيف ؟؟
عذبونا الخواجات ا( بالزنبق) دا …. أي قصيدة فيها زنبقة ….لي هسا أنا ما عارفا شنو …!!
بس إحساسي بقول لي انها ( قنبلة ) …..!! 🌚
المهم ( وعد) بقت لو ما لاقت ( الحبر ) ما بترتاح…!!
ونحنا مستغربين في العلاقة بين ( التيمز ) ونهر ( الدندر ) دي ……..!!!
يازول خلت الورا والقدام ….!!! بس مركزا ليك مع ( الحبر …) دا
والحبر يتجرجر ….( ليلة القدر وجاتو) ….!!
لقيناها تشرب معاهو في الشاي في كافتيريا (ضاربه ) كدا جنب الجامعة اسمها كافتيريا (العائلة السعيدة ) …..
عايلة واحده ماشفناها جات لآفة هنا مما جينا الجامعة دي ….!!!
وسعيدة كمان …..!!! 😳
الله يغفر ليكم بس …..!!
غايتو أهلها كان شافوها قاعدة هنا كان نفضوها ….!!!
كويس إنو شاي….!!
دي لو أكلت كان اتسممت وسجنو ( الحبر ) ….!!
يبدو أن ( وعد ) تفتقد لهكذا أجواء …. لقد أخرجها ( الحبر ) من الصندوق ….!!!
وعرفت أن هناك مدينة تتنفس غير التي تعرفها …وهناك ضجيج وحياة ….!!
وبعيدا عن مكيفات الهواء الرطبة …وسكون الغرف المغلقة …!!هناك شمس تلسع وتداوي ….!! وأناس طيبون يمتلئون بالإحساس والدفء… 💕
وخلف مدينتها توجد مدينة أخري موازية لكنها علي النقيض ..وعلي طبيعتها ..دون مكياج وبلا رتوش ….!!
( وعد ) أحبت هذا الواقع ….لكنها لم تستطع أن تتأقلم معه
فالطبع يغلب التطبع ….!!وفشل (الحبر ) رغم هذا التقارب
إنو يقطع ( مسدار ) في ( وعد ) ….!! فالمسدار يستوجب الصدق والإحساس …وكيمياء الروح ….!!
( وعد ) تجيد الإنجليزية لكنها متعثرة في المحلية ….!! تعيش معنا وفكرها مع ( دياز ) ….!!!
( الحبر ) قال لي ( وعد ) دي زي بت ( أم لعاب ) سمحة ومتمرة إلا ما طاعمة ….!!
قلنا ليهو والله طاااعمة مالا الا انت مُر
يضحك سااي
خلينا مع القمري السوداني الأصيل البقوقي دا …بنات يشفِقن
….!!! سلافة بكل هذا الجمال الطاغي وكت تقول ليك
( أصلو ما بصدق ) ….لما تفهم حاجه …!!
وتشعر وقتها أنك داخل السودان الحنان …..!!!
وعد بتقول …( اووه ماي قود ..) ….!!
تجاذبنا أطراف كل هذه الذكريات بعد أن التقيت ( الحبر) صدفة في مجمع الجوازات ….وَيَا لها من صدفة ….!!!
ياهو ( الحبر ) ذاااااتو بكل عفويته وعذوبته ….. إتقالدنا واتطايبنا مساااافة …..!!!
قلتا ليهو أوعي بس تكون لسا متابع السمحات ….!!! ضحك جنس ضحك …قال لي فضلو فيها سمحات …طارت لينا في راسنا دا ….!!
اشششش براحة ديك المدام الجاية ديك ….!!!
( صدق من سماها الحكومة)
فعلا وصلت زوجته ….سلمتا عليها قال ليها دا ( علوب ) صاحبي شديد وفردتي من الجامعة ودي ( تماضر ) زوجتي وطبعا ماكانت معانا في الجامعة ….!!
قلتا ليهو سلامة الله شافك كان قبضتك بالثابتة …!!
قعدو يضحكو الاتنين ….!!
قال ليها علوب دا بتاع مشاكل …!قلتا ليهو أقوووول …
قال لي قول ..أتحداك ..(معاها غمزة في العين …) 😜
قلتا ليها بالجد انت محظوظة…!! ( الحبر ) راجل كلس وخاتي القول كان مميز في كل حاجه ….( لما قعدت تتبسم ) …☺️
قلتا ليها حتي إختياراتو كانت مميزة …!!
قالت لي ( سجم خشمنا ) اختياراتو ياتا …!!؟؟
(سجم ….!! وخشم ) تعالي يا ( وعد ) اخدي ليك نقلة
وشوفي الكلام …!! وحلات النضم …!!!
قلتا ليها زول يشيل الإنجليزي تخصص رئيسي ومعاهو
تاريخ …دا مازول جدير بالاحتفاء ….!!؟؟
( كبير ياعلوب ) ( الحبر لما آمن ) …!!
( ما عارفاهو كان شايل سلافة و إنتصار ) ..
أداني ليك حضنة قوية وقال لي في أضاني ….!!! عزيتني ياعلوب بردها ليك ….( أنا ذاتي صدقتا …!! )
قلتا ليها صدقي زولك دا خلي الهندسة عشان رغبتو العظيمة دي …!!
بس في اللحظة دي ( الحبر ) ضحك شديد قال لي هيااا علوب ما كلمتك ما اكتشفتا ليك ناس
( جتا وظتا وسين وصاد …)
طلعو ديل البطيرو الصواريخ …🚀 وبشغلو النت …وبدورو الطيارات …!! ✈️ …..!! بتصدق ….!!!
وفقعناها ضحكة ….!!!
وتماضر مرتو تضحك لضحكاتنا التي تعالت تلامس السحاب …..!!
الله يجازي محنك يا الحبر
تبادلنا الذكريات وأرقام الهواتف …وافترقنا علي أمل لقاء
الحبر أعاد للاسم البريق ….وحتما سيجمعنا الطريق ….
ياحليلك ياخ …..!!! 🥰
كانت لنا أيام🌹
#اووووه _مااااي ..قود …..!!!
