للمرة التانية الطريق دا ما بوصلك …
عايز تغني بالمصري غني أغنية كبيرة اذا أردت وصول أكبر ….!!
فنانين كتار عملو كدا الجمهور المصري كبير
ومدخل لإنتشار عربي بعد داك مرر غناك
أو غني أغنية باللغة العربية الفصحى وراك ثمانيه وعشرين عازف محترف وقاعدين ودا بزنس business
أدفع البتدفعوا دا أو الجهات البتوفر ليك تمويل فيهم
استعرض فيها مهاراتك الصوتية من الممكن ان تلفت الانتباه
غُنا المهرجانات دا المصريين ( الفي النص ) هم ذاتم عندهم فيهو راي …وديل كتار برضو
وحتى لو وصلك بوصلك أسفل المدينة
اسفل المدينة تعمل بيهو شنو …!!؟؟
الزول البنصحك دا عايز يستفيد منك ..لكن قلبو ما عليك
المحلية طريق للعالمية إذا كانت الأدوات موجودة
السودانيين جمهورك الأصلي والأساسي والبوديك لي قدام ولا ضير من طموح أعلى
وهو غاية أي فنان
إنت شوفهم براك لما غنيت ليهم غناك البعرفو
كيف تجاوبو معاك
اول ما مشيت ( تلسع ) …وقفو شوية
( محمد منير ) غنى لونيتو فتوجه المصريون ملكاً
السلطان ما لبسة بس …
البفكر ليك كدا
عايز يختك في مقارنه ومقاربة مع ( محمد رمضان ) ماعندها معني ..!! وبتخسرها مع ناسو …!! ماكينته الإعلامية أقوى
( جورج وسوف ) ( سلطان ) لأنه يحرك بصوته المعجبين
من البقاع حتى طنجة
( كاظم الساهر ) عراقي ينسى الناس جنسيته عندما يغني
انت لو ماعندك صوت ما بخسر فيك حرف ..
المشكلة عندك …وإمكانيات مهولة وديها صاح
أقدر جداً طموحك اللامحدود وهو وقود الفنان الحقيقي
بس مراتٍ الوقود ( بحرق ) إذا دست ( ابنص ) زيادة
ماتعتمد على ( الترند ) الترند دا زي اللبن بفور
وبرجع …ومرات كتيرة ( بتدفق )
السودانيين أحسن ناس بسمعوا …وبقيّمًوا …إستفيد من دي
وانطلق بلا حدود ….. ولكن بشكل مدروس ….!!
فلديك ما تقوله
