الطيب عبدالماجد يكتب: ليلة السب
يوميات علوب ….
( مواهب …مروة ….سهيلة )
اعرفو تومتي ياتا ….
بورتريه ( إنتظار )
صاحبي ( منذر ) دا ود ظريف كدا عاجبا روحو طوالي نضيف ومتمر …!!
قاشط ليك ( الجينز ) دا والتيشرتات ماتديك الدرب …!!
وقروشو دي كلها كملانة حلاقة ….!!
شعرو دا فضل ليهو يشتكي كل يوم حارتنو ……!!
المهم لاقيتو ليك في عرس كدا في صالة ( المعلم )
عرس صاحبنا …قلتا ليهو و إنتا مالك بي جاي ..!!
قال لي كيف ياعلوب ياخ …العروس دي ما ( بت خالتي ) قلتا ليهو والله صدفة عجيبة نحنا تبع العريس ( طارق )
دا صاحبنا شديد …كويس لاقيناك طولنا منك ..!!
وماشاءالله العروس جميلة …!! ما تشوف أختا طالما فوتها ….!!!
قال لي ياخ هو نحنا ماحظنا دا أصلو طواالي ضارب…
هسي غايتو عندي تلاته مرشحات ياعلوب بس كل واحده عندها مشكلة ….!!
( وأنا عادة يستهويني هذا التشريح المجتمعي …!!
علي الأقل ناخد فكرة عن الحاصل …) …!!
قلتا ليهو شوف يامنذر لايوجد كمال في الدنيا الكمال لله …!! اتوكل ساي يا اخوي …!!
أها مشكلتن شنو مرشحات ( البيت الأبيض ) بتاعنك ديل ياسلطان زمانك …!!
يضحك سااي قال ابدا ولا سلطان ولا حاجه ….!!
أنا بحكي ليك و إنتا أحكم…!!
قال لي الأولي دي إسما ( مواهب ) بت ظريفة كدا بعرفا من الجامعة وفردتنا كانت ..!!
أجمل حاجه فيها إنها علي طبيعتا …!!
أصلو ما عندها قشة مرة ….!!
بتغسل وشها دا وتبقي مارقة …!!
مرات بتلبس ( كبك ) ….😳
وعادي بتدرع ليها أي حاجه كدا وتجي دافرا
قلتا لي اها ومشكلتا شنو ( مواهب ) دي ؟؟
قال لي ياخ دي بتحب العضة حب ماطبيعي …!!
بترجف قبل الأكل مايجي
حافظا ليك المطاعم دي حفظ ..!!
مره قالت لي ( التاج ) دا غايتو كان يدوهو ( وسام الإنجاز ) ⭐️
قلتا ليها ( التاج ) منو…!!؟ 😅
طلع ( الدليفري ) البوصل الطلبات ….!!
قالت مواعيدو انجليزية …حافظاهم بالاسم ياعلوب …!! ياخ دي نمر ( مواترم) 🏍 حافظاها …
هم ذاتم بحبوها شديد …بقولو ليها ( هوبا ) اللهلوبة
واحترامات تقيلة …!!وهي فعلا زولة محترمة …بتتعامل مع كل الناس بي ذوق …..وخاصة ديل …..!!
قال لي لو مشينا أكلنا بره بتآكل كدا وطوالي بتنعس تقرب تنوم في المطعم ….وبتحب الحلويات موت ….!!
تشوفا كدا بتجيها الحالة ( الحمارية ) ما بتزح من جنبها ….وتقعد تتمطق …!!
قلتا ليها إنتي أصلو ماسمعتي بي حاجة اسمها ( ريجيم ) …!!
قالت دا شغل عطالة ساكت … !!
اها ياعلوب دي ( هوبا )
و غير كدا والله لطيفة وظريفة شديد…. جنها ضحك..وجذابة شديد رغم الجضوم ….والكدارة ….!!
قال لي بتسلم علي في كتفي …!! ومرات لو قلتا لي حاجه ماعجبتا …بتديني لبعة بالشنطة في نص الضهر
حركة لا إرادية كدا ….!!!
بعدين ماتشوف الاكل دا شغلا ما بتلعب فيهو الأكل أكل والشغل شغل …شفتا كيف. ….!!
قلتا ليهو ( غايتو الله يورينا ( هوبا ) دي ..!! اشتهينا نشوفا الله يعلم ….!!! حربية ياخ )
أها والتانية قصتا شنو ..!!؟
قال لي دي صاحبة اختي قرت معاها الجامعة …..!! ساكنين ( الرياض ) …!! ( طلطاشر ) سنة في (ايرلندا ) وجو استقرو هنا ….!!الكلام نصو إنجليزي ….اسمها سهيلة …!! 😍
( في اسماء كدا تسمعا طوالي بتحس إنو في نسيم هبا ) 😇
قال لي دي عكس ( هوبا ) …!! ضعيييفة ..سحلية بس ….!! بتعشق ( السوووب ) قلتا ليهو (سوب ) دا منو …!! ؟؟. 😳
طلعت الشوربة …..!!
قال لي قالت بتحب شوربة الشوفان مع الفطر والكريمة الله قادر ….!!
( هن ديل شنو ذاتن ) …!! فرقة ولاشنو ..! 🎹🥁
حكمة الله التلاته مافيشات ….الا كان بجيبوهم من ايرلندا ….!!
وقت تقول ليك ( دبلن ) …!! نحن قايلنها ملاية
مره قلتا ليها إنتي فنانك المفضل منو ..!!
قالت لي ( دريك غراهام ) …😳
انا قايلو إسبير ( أتوس ) ،، وطلع يهودي كمان
( شوف التصالح والحوار دا كيف مع الأديان ) ……!!
( سهيلة ) ياعلوب في حالة قرف دايم من الحر والمطرة والبعوض …!! ودا مثلث لايمكن ان يغيب
غايتو ميزتا الوحيدة إنو أنا عاجبا …!!
قالت أنا إستايل وبذكرا ممثل امريكي كدا اسمو منو كدا ( سميث ) ما بتذكرو ….!!
قالتو لي أختي وهي الكلمتني …! قالت بشبهو
اخوك ما وجية كمان .( يشكر في روحو …!!
( غايتو الحلاقة جابت تمنا )
قال لي بس غايزاني حكاية بشبه ممثل دي ….!!
بكون دا السبب الوحيد الدايراني بيهو ..الرايحة دي ….
بتصدق ياعلوب قالت لي ( داد ) …!!
(!داد) دا طلع ابوها
) أنا قايلو ( مبيد ) …!!
قالت مره اشتري لوحة بي خمسة ألف يورو إسمها ( بورتريه إنتظار ) …،،،🖼 …….
المابخجل
حسبتها بالسوداني مالقيت ليهو لقب يناسبو غير
( فايق افريقيا العظيم ) …..!!
وفضلنا وحاتك منتظرين
ينتظرك يايابا أسد ياكلك
أبوها دا كان شغال في UN..كل شغلم بجو يعبرو عن قلقم الصباح ويرجعو البيوت …ليك حق تشتريها
نحنا اللوحة الوحيدة العندنا في البيت ياها بتاعة
( الطفل الببكي ) داك …وطابعناها في كرتونة كمان لما إنتنت معلقنها في نص الأوضة جات عليها موية المطرة ….
بدل الدمعة النازلا ديك بقينا عيونو ذاتا ماشايفنها الشافع دا من كترة الدموع ….!!! 😅
( نصها موية مطرة ) …!!
تلقي هو ذاتو قال أنا الجابني وعلقني هنا شنو …!!
إنتو هو الولد دا قصتو شنو …!! شايفو طواااالي معلق في الحيط دي كلها في بيوت الحلة …..!!!
ياربي يكون ود ( بعانخي) …!!!!😳😳
…المهم ( سهيلة ) سهولة شديدة ياعلوب ….!!
وجنس رقة ملساااااا …( دبيب ) بس ….!!
هي ماسمحة شديد لكن ياعلوب نضيفة نضافة …..!! قزازة بس …
بس كان خلت الخُلعة الداخلاها طوااالي دي …
مثلا تقول ليها والله امبارح ( الكتاحة ) حمتنا النوم …
طوالي تنطط عيونا ..شككتنا في روحنا دي …بنتكلم صيني نحنا ولاشنو ….!!
وانا بصراحة مرات بقول ليها حق …
السودان دا ذاتو مرات كتيرة بخلع ….😳😳😳
مره قلتا ليها ناس بيتنا ماشين ( الجزيرة سلانج )
عندنا ( بكا ) …!!
خلت ليك أي حاجه ولا كلفت نفسا قالت لي المات منو …!! بس مسكت ليك في ( اسلانج ) دي ….عجبتا شديد ..قالت لي اوووو ( سلانج ) اسمها ( كيوت )
قلتا ليها ( فرح ودتكتوك ) كان عارفك كان قال اخر الزمن الكلام بالخيوت والسفر بال ( كيوت ) ….!!
سنة يالكيوت ….( كيوت العنكبوت )
سهيلة دي غايتو كان جاتنا في الحلة ناس ( أمونة ) عااادي بعملوها شوربة ..ويشربوها ….!!
انا طبعا اتخيلتا المنظر ….😇
قلتا لي أها أدينا المرشح التالت…….!!
قال لي أها دي ياعلوب بت أهلي لزم …! بت عمتي طوالي ….( عمتي محاسن ) ….!!
وهي زولة كويسة شديد إسمها ( مروة ) ….
لكن ناس بيتم …لما يتلاقو مع ناس بيتنا
في مناسبة ….شفتا ( الروم ) لما يتلبدو للمسلمين في المسلسل …!! بس دا ياهو المنظر
( عداء تاريخي )
اخر مناسبة دي حصلت ملاسنة كدا كادت أن تؤدي لوقوع جريمة وسقوط ضحايا ….!!!
قلتا لي كيف الكلام دا …!!؟
قال لي عمتي ( محاسن ) دي بدون سبب كدا… !!
قالت …..يااااحليلك يا ( مصطفي ) أخوي لو كنتا حي كان حسمتا الفوضي دي …!!!
بس كدا …!! ما زادت
دون الإفصاح عن ماهية الفوضي ومصدرها ….!!
ولم تتأخر ( الوالدة ) طويلا في الرد …!!
قالت ليها والله صدقتي با ( محاسن ) …الله يرحمو
( مصطفي ) علي الأقل لو كان حي ( البيت الكبير ) دا ما كان إتشلع بالطريقة دي ….!!
في إشارة لي بيت ناس أبوي وأعمامي وعماتي ديل …
لأنو قسمو البيت بيناتم أي زول شال نصيبو وأدونا نحنا حق أبوي وواحدين منهم باعو حقهم للغربا وشهرين
متشاكلين ليهم في (حمام ) كل واحد بقول ( الحمام) دا في حدودو الإقليمية …
قربو يمشو ( لاهاي ( تحكيم دولي ..!!
اها بعد الجدعات دي بين الحاجة وعمتي… العيون حمرن 👀 والقرون طلعن 😡 والجو اتكهرب وأوشكت الحرب ان تقع لولا تدخل الأجاويد …..!
أها دا وضع ( مروة ) ياعلوب …!!
رغم إنو عمتي محاسن أمها دي بتحبني شديد ..
قالت ( منذر ) ود السرور طالع لي أبوهو وأهل أبوهو وشايل شبهو …
في رسالة مبطنة وملغومة للحاجة …!!
اها ( محاسن ) دي أمي ساماها ( مفاتن ) ومرات بتدلعا بتقول ليها ( مغارز ) …..!!! 😂😂
عليك الله هسا قضية فلسطين ما أسهل من الوضع دا …
أها ياعلوب دي الحالات التلاته واعرفو تومتي ياتا ….!!
بدون ما أتردد طوالي قلتا ليهو أقع ( مواهب ) ….!
البت دي هي الزيت …
الاكالة دي مابتبخل علي روحا ولا علي بيتا ….تفرش ليك حياتك دي ( باسطة ) وحات الله ….والنوع دا كريم ومتجدد …!! كل يوم صنف ….
( هوبا ) ياخ ست الشي كلو ….
قال لي والله انا ذاتي قلتا كدا حنينة ياخ مواهب …..!!!
بس خايف ميزانية البيت كلها تكون ( النفط مقابل الغذاء )
قلتا لي أخير ليك من ( مروه ) الميزانية كلها حتمشي
للأمن والدفاع ….!!
وكمان كان الله سهلا عليك ووقعتا في ( سهيلة ) ياكا الوقعتا في أيدي المستعمر والإحتلال …طول عمرهم حيشوفوك ( دبيب ) وبعام
ناس اليورو و الإتحاد الأوروبي ديل شعرا ماعندك ليهو رقبة …!!
ديل هجرة من العالم التالت دا ذاتو مادايرنها
قالو ليك ( بورترية ) إنتظار …جاي خامي الطفل الباكي ….!
😭 ضحكنا ضحك أنا ومنذر …!!
😂😂😂
تبكي بس …….!!
