من الذكريات البحب أحكيها وأعيدها .
زمان نحن أتنين (حبينا) بت واحدة.
والبت دي كانت عندها (أتنين وجنة في خد واحد).
شكلو الله أداها (وجنة) أصلية والتانية إحتياطي .
أنا كنت مُراهن على (الكلام وحسن التعبير).
وصاحبي داك كان مُراهن على (الهدايا وحسن التدبير) .
أنا قلت بالمنطق والكلام الطيب ح أدخل قلبها .
لكن هو شبك ليك البت دي هدايا لما أنا ذاتي بقيت ما متوازن.
والزمن داك أغلى هدية ممكن تجيبها للبت (مُزيل عرق).
هو كان كل ما يقابلها يديها (مُزيل عرق) هدية.
وأنا كل ما أقابلها بقرأ ليها شعر.
قابلتها في شارعنا وقلت ليها : (الغروب بسألني منك وأمسياتنا في شوق إليك والرمال الناعمة مشتاقة لمشيك).
لما قلت ليها كده لما بلعت ريقها.
قلت أحسن أدبل ليها .
قلت ليها من أشعار ليلى المغربي (أنا ما جايك وشايل أفراح تملأ الدنيا).
شوق الحبان وعطر الريحان وأجمل منية .
تاني يوم هو قابلها جاب ليها (مُزيل عرق).
الله يقطع سنين العرق وسنين المُزيل.
بعد أسبوع أنا قابلتها وقلت ليها : (أحلى منك قايلة بلقى ولا غيرك ممكن أبقى).
هو قابلها جاب ليها ربع دستة (منكير).
أنا اديتها (منديل ورق) وكتبت عليهو (ليلي دون الناس كلو آهات).
هو قابلها جاب ليها (12) غويشة بتاعت بلاستيك وبرضو معاها مُزيل عرق.
غايتو البت دي ما أظن تكون (عِرقت) قريب.
جاب ليها عشرمية مزيل والله .
ما أدى (العرق) ذاتو فرصة .
المهم .
أنا قلت أطلع من الشعر السوداني وأدخل ليها في الشعر الجاهلي والفصيح.
قلت ليها : (وما كنت ممن يدخل العشق قلبه ولكن من يُبصر جفونك يعشق) .
هو قابلها جاب ليها (نظارة شمسية).
قلت ليها : (ما عجبي موت المحبين في الهوى ولكن بقاء العاشقين عجيب).
هو قابلها جاب ليها (ساعة يد) لونها أحمر.
أنا دخلت ليها في غناء الحقيبة ثم ما خليت الكاشف ولا أبو صلاح.
حتى (من الأسكلا وحلا) قلتها ليها.
وصلت معاها لحدي (الفينا مشهودة) و(بتريد اللطام).
(نشيد العلم) ذاتو قريتو ليها.
لكن في النهاية (ود اللذينا) اداني القاضية وعزمها (باسطة بالحليب).
والزمن داك لما تعزم بت باسطة الحلة كلها بتتكلم بالعزومة دي.
وأنا أكتر حاجة زعلتني إنو الزولة دي بعد الباسطة والحليب دا جاها تسمم .
تسمم عديل .
مش المفروض على حس التسمم دا تكره صاحبي دا وتكره حنانو ذاتو ؟؟
ابداً والله .
ولا كرهتو .
بعد (إتسممت) وبقت كويسة قابلتها وقلت ليها : (النضارة الفي شبابك والطفولة الفي عينيك والقلوب الحايمة حولك يا حلو بتتمنى ليك بكرة تشفى وبكرة نفرح بيك).
ما إشتغلت بي .
الباسطة أحدثت الفرق ومال قلبها نحو (السكريات) وأنا قلبي ضاع.
ومن يومها قررت ما أدخل في علاقة محتاجة رأس مال.
و…
ويا أستاذة : نحن رأس مالنا بلح شام ساكت .
و…و…
وحليل شوقي وعويناتك تلاقيهو يدور يرجع وتحلف ……… (تديهو حق المواصلات).
#محمد_الطيب_الأمين
